कोल्हापूर : श्री जोतिबाच्या चैत्र यात्रेनिमित्त दरवर्षी लाखो भाविक डोंगरावर गुलाल-खोबऱ्याची उधळण करण्यासाठी येतात. या भाविकांच्या सेवेसाठी कोल्हापूरच्या ‘सहज सेवा ट्रस्ट’च्या वतीने यंदा ३० मार्च ते २ एप्रिल २०२६ या कालावधीत गायमुख परिसरात भव्य अन्नछत्राचे आयोजन करण्यात आले आहे. यंदा या उपक्रमाचे २६ वे वर्ष असून, सुमारे २ लाख भाविकांना अहोरात्र महाप्रसादाचा लाभ मिळणार आहे.
या उपक्रमासाठी १५ हजार चौरस फुटांचा भव्य मंडप उभारण्यात आला आहे. निसर्गाचे रक्षण व्हावे या उद्देशाने ट्रस्टने यंदा प्लास्टिकचा वापर पूर्णपणे टाळला आहे. भाविकांना स्टीलच्या ताटातून भोजन दिले जाणार असून, स्वच्छतेकडे विशेष लक्ष दिले जाणार आहे. तसेच, डोंगर चढून येणाऱ्या गोवंशासाठी (मुक्या प्राण्यांसाठी) पेंड आणि भुशाची स्वतंत्र व्यवस्था करण्यात आली आहे.
या महाप्रसादासाठी १५ हजार किलो बासमती तांदूळ, ३ हजार किलो डाळ आणि ट्रकभर भाजीपाल्याचा वापर केला जाणार आहे. सुमारे ४०० स्वयंसेवक भाविकांना सेवा देण्यासाठी अहोरात्र कार्यरत राहणार आहेत. केवळ अन्नदानच नव्हे, तर प्रशासकीय यंत्रणेचीही काळजी घेत पोलीस, होमगार्ड आणि इतर कर्मचाऱ्यांसाठी स्वतंत्र भोजन पाकिटांची सोय करण्यात आली आहे.
अन्नछत्राच्या ठिकाणी २४ तास वैद्यकीय सेवा, रुग्णवाहिका आणि रक्तदान शिबिराचेही आयोजन करण्यात आले आहे. भाविकांना कोणत्याही प्रकारचा त्रास होऊ नये, यासाठी ट्रस्टच्या वतीने सूक्ष्म नियोजन करण्यात आले आहे. कोल्हापूरच्या या ‘सहज सेवा ट्रस्ट’ने आपल्या सामाजिक बांधीलकीतून यात्रेचा उत्साह अधिक द्विगुणित केला आहे.
