नवी दिल्ली: ‘एक भारत श्रेष्ठ भारत’ उपक्रमांतर्गत महाराष्ट्राच्या समृद्ध लोकपरंपरा आणि सांस्कृतिक वैभवाचे दर्शन घडविणारा ‘लोकोत्सव’ हा विशेष सांस्कृतिक कार्यक्रम काल सायंकाळी नवी दिल्ली येथील महाराष्ट्र सदन येथे मोठ्या उत्साहात संपन्न झाला. महाराष्ट्रातील पारंपरिक लोककला आणि संस्कृतीचा वारसा देशाच्या राजधानीत पोहोचविण्याच्या उद्देशाने या सोहळ्याचे आयोजन करण्यात आले होते.
मान्यवरांच्या हस्ते दीपप्रज्वलन: सांस्कृतिक कार्य विभाग (महाराष्ट्र शासन), सांस्कृतिक कार्य संचालनालय (मुंबई) आणि महाराष्ट्र परिचय केंद्र (नवी दिल्ली) यांच्या संयुक्त विद्यमाने हा कार्यक्रम आयोजित करण्यात आला होता. कार्यक्रमाचा प्रारंभ निवासी आयुक्त तथा सचिव आर. विमला आणि माहिती संचालक हेमराज बागुल यांच्या हस्ते विधिवत पूजन करून करण्यात आला. यावेळी सहाय्यक निवासी आयुक्त नितीन शेंडे, स्मिता शेलार, जनसंपर्क अधिकारी मनीषा पिंगळे, व्यवस्थापक प्रमोद कोलपते यांच्यासह दिल्ली परिसरातील अनेक महाराष्ट्रप्रेमी नागरिक मोठ्या संख्येने उपस्थित होते.
महाराष्ट्राच्या लोककलांचे रंगतदार सादरीकरण: या ‘लोकोत्सवा’त मुंबईतील अमित घरत ग्रुप यांनी महाराष्ट्राच्या विविध लोककलांचे बहारदार सादरीकरण केले. यामध्ये प्रामुख्याने लावणी, गोंधळ, कोळी नृत्य, वाद्यसंगीत आणि पारंपरिक लोकगीतांचा समावेश होता. ढोल-ताशांच्या गजरात आणि कलाकारांच्या प्रभावी सादरीकरणामुळे संपूर्ण महाराष्ट्र सदन परिसर मंत्रमुग्ध झाला होता.
सांस्कृतिक एकात्मतेचा संदेश: ‘एक भारत श्रेष्ठ भारत’ या मोहिमेचा मुख्य उद्देश असलेली सांस्कृतिक एकात्मता आणि विविध राज्यांमधील परस्पर सांस्कृतिक देवाणघेवाण या कार्यक्रमामुळे अधिक दृढ झाली आहे. महाराष्ट्राचा ऐतिहासिक आणि कलात्मक वारसा दिल्लीतील रसिक आणि मान्यवरांपर्यंत यशस्वीपणे पोहोचविण्याचे काम या लोकोत्सवाने केले. कलाकारांच्या ऊर्जापूर्ण सादरीकरणामुळे उपस्थितांनी टाळ्यांच्या कडकडाटात या सोहळ्याचे स्वागत केले.
