नवी दिल्ली : देशाच्या राजधानीत महाराष्ट्राच्या समृद्ध लोककला आणि सांस्कृतिक परंपरेचा जागर होणार आहे. ‘एक भारत श्रेष्ठ भारत’ या उपक्रमांतर्गत महाराष्ट्र शासनाचे सांस्कृतिक कार्य संचालनालय, मुंबई आणि महाराष्ट्र परिचय केंद्र, नवी दिल्ली यांच्या संयुक्त विद्यमाने ‘लोकसंस्कृती लोकोत्सव’ या विशेष सांस्कृतिक कार्यक्रमाचे आयोजन करण्यात आले आहे.
महाराष्ट्राच्या लोकसंस्कृतीचे दर्शन
या लोकोत्सवाच्या माध्यमातून महाराष्ट्राच्या कानाकोपऱ्यातील लोकसंस्कृतीचे दर्शन दिल्लीकरांना घडणार आहे. लावणी, पोवाडा, कोळीगीते आणि भारूड यांसारख्या विविध कलाप्रकारांतून महाराष्ट्राचे सांस्कृतिक वैभव व्यासपीठावर अवतरणार आहे. राज्याच्या समृद्ध वारशाचा परिचय इतर राज्यांतील नागरिकांना व्हावा आणि सांस्कृतिक देवाणघेवाण वाढावी, हा यामागचा मुख्य उद्देश आहे.
कार्यक्रमाचा तपशील
दिनांक: १९ मार्च २०२६
वेळ: सायंकाळी ६:०० ते रात्री ८:००
स्थळ: सभागृह, महाराष्ट्र सदन, के.जी. मार्ग, नवी दिल्ली.
महाराष्ट्र सदन आणि सांस्कृतिक कार्य संचालनालयाच्या वतीने या कार्यक्रमाची जय्यत तयारी करण्यात आली आहे. दिल्लीत वास्तव्यास असलेल्या मराठी बांधवांसह सर्व रसिक प्रेक्षकांनी या सोहळ्याला उपस्थित राहून महाराष्ट्राच्या कलाकारांना दाद द्यावी आणि या सांस्कृतिक सोहळ्याचा आनंद घ्यावा, असे आवाहन आयोजकांकडून करण्यात आले आहे.
