मुंबई : राज्यातील २८८ नगरपालिका आणि नगरपंचायतींच्या निवडणुकीत भारतीय जनता पार्टी आणि महायुतीने ऐतिहासिक यश संपादन केले आहे. या विजयानंतर पत्रकारांशी संवाद साधताना मुख्यमंत्री देवेंद्र फडणवीस यांनी महाराष्ट्रातील जनतेचे आभार मानले असून, हा विजय म्हणजे आगामी महानगरपालिका निवडणुकीचा ‘ट्रेलर’ असल्याचे विधान केले आहे.
भाजपची दुपटीहून अधिक झेप
निवडणुकीचे कल आणि निकाल स्पष्ट झाल्यानंतर मुख्यमंत्र्यांनी विजयाची आकडेवारी मांडली. ते म्हणाले:
नगराध्यक्ष पदे: २०१७ मध्ये भाजपचे ९४ नगराध्यक्ष होते, यंदा ही संख्या १२९ (४५ टक्के) वर पोहोचली आहे.
नगरसेवक संख्या: २०१७ च्या १६०२ जागांच्या तुलनेत यंदा भाजपने ३३२५ (४७.८२ टक्के) जागा जिंकत दुपटीहून अधिक यश मिळवले आहे.
महायुतीने एकूण २८८ पैकी २१५ नगरपालिका (७४.६५ टक्के) जिंकल्या असून, एकूण ६९५२ नगरसेवक जागांपैकी ४३३१ जागांवर (६२.३० टक्के) विजय मिळवला आहे.
मोदींच्या नेतृत्वावर जनतेचा विश्वास
“पंतप्रधान नरेंद्र मोदी यांच्या विकासकामांच्या नेतृत्वावर महाराष्ट्रातील जनतेने पुन्हा एकदा मोहोर उमटवली आहे. भाजपचे राष्ट्रीय अध्यक्ष जे.पी. नड्डा आणि कार्यकारी अध्यक्ष नितीन नबीन यांच्या मार्गदर्शनाखाली हा दणदणीत विजय मिळाला आहे,” असे मुख्यमंत्र्यांनी नमूद केले.
रवींद्र चव्हाण यांचे विशेष अभिनंदन
महाराष्ट्र भाजपचे प्रदेशाध्यक्ष रवींद्र चव्हाण यांच्या नेतृत्वाखालील ही पहिलीच मोठी निवडणूक होती. त्यांच्या नियोजनाचे आणि कष्टाचे कौतुक करत मुख्यमंत्र्यांनी त्यांचे मनःपूर्वक अभिनंदन केले. तसेच या विजयासाठी अहोरात्र कष्ट घेणाऱ्या कार्यकर्त्यांना हा विजय समर्पित केला.
विरोधकांवर हल्लाबोल आणि कार्यकर्त्यांना आवाहन
“हा आगामी महानगरपालिका निवडणुकांचा ट्रेलर आहे. यापेक्षा मोठे यश मिळवण्यासाठी सर्वांनी ताकदीने कामाला लागावे,” असे आवाहन मुख्यमंत्री फडणवीस यांनी कार्यकर्त्यांना केले. दरम्यान, या दणदणीत विजयानंतर मुख्यमंत्री देवेंद्र फडणवीस यांची पत्रकार परिषद पार पडली. या पत्रकार परिषदेत त्यांनी मतदारांचे आभार मानतानाच विरोधकांवरही जोरदार हल्लाबोल केला
