BMC Election 2026: मुंबई महानगरपालिकेच्या (BMC) सत्तेसाठी गेल्या अनेक दिवसांपासून सुरू असलेला महायुतीचा जागावाटपाचा तिढा अखेर सुटला आहे. उमेदवारी अर्ज भरण्याच्या शेवटच्या दिवसापर्यंत (३० डिसेंबर) चाललेल्या प्रदीर्घ चर्चेनंतर भाजप आणि एकनाथ शिंदे यांच्या शिवसेनेमध्ये जागावाटपाचा फॉर्म्युला निश्चित झाला आहे. अनेक दिवसांच्या रस्सीखेच आणि प्रदीर्घ चर्चेनंतर सत्ताधारी महायुतीने आपला जागावाटपाचा फॉर्म्युला निश्चित केला आहे. मुंबईतील एकूण २२७ जागांपैकी भारतीय जनता पक्ष (BJP) १३७ जागांवर निवडणूक लढवणार आहे, तर एकनाथ शिंदे यांची शिवसेना ९० जागांवर आपले उमेदवार उभे करणार असल्याचे स्पष्ट झाले आहे.
बृहन्मुंबई महानगरपालिका निवडणूक निमंत्रक आणि भाजप नेते अमित साटम यांनी या जागावाटपाची अधिकृत घोषणा केली. “आम्ही २२७ जागांवर एकमताने निर्णय घेतला असून, आगामी काळात आम्ही एकत्रितपणे प्रचार करणार आहोत,” असे साटम यांनी स्पष्ट केले.
शेवटच्या क्षणापर्यंत रस्सीखेच
जागावाटपावरून दोन्ही पक्षांमध्ये जोरदार चर्चा सुरू होती. विशेषतः काही महत्त्वाच्या प्रभागांवरून दोन्ही पक्षांनी दावा केला होता. मात्र, बंडखोरी टाळण्यासाठी आणि विजयाचे समीकरण जुळवण्यासाठी दोन्ही नेत्यांनी सामंजस्याने ‘सुवर्णमध्य’ काढला आहे. भाजपने आपली अधिकृत उमेदवार यादी सार्वजनिक न करता त्याऐवजी, रात्री उशिरापर्यंत निवडक उमेदवारांना बोलावून थेट ‘एबी फॉर्म’ (AB Form) सोपवण्यात आले आहेत. शिवसेनेनेही (शिंदे गट) याच पद्धतीने आपल्या शिलेदारांना मैदानात उतरवले आहे.
जागावाटपाचा फायनल फॉर्म्युला:
मुंबईतील एकूण २२७ जागांसाठी महायुतीने खालीलप्रमाणे विभागणी केली आहे:
भारतीय जनता पक्ष (BJP): १३७ जागा
शिवसेना (एकनाथ शिंदे गट): ९० जागा
एबी फॉर्म वाटप: बंडखोरी रोखण्यासाठी अनेक उमेदवारांना थेट ‘एबी फॉर्म’ देण्यात आले आहेत.
मतदान तारीख: १५ जानेवारी २०२६.
निकाल: १६ जानेवारी २०२६.
अजित पवार गटाची स्वतंत्र चूल!
या निवडणुकीत महायुतीमध्ये मोठा बदल पाहायला मिळत आहे. उपमुख्यमंत्री अजित पवार यांच्या नेतृत्वातील राष्ट्रवादी काँग्रेसने (NCP) मुंबईत स्वतंत्रपणे लढण्याचा निर्णय घेतला आहे. भाजपने नवाब मलिक यांच्या नेतृत्वाखालील राष्ट्रवादीसोबत युती करण्यास नकार दिल्याने अजित पवार गटाने आतापर्यंत ६० हून अधिक जागांवर स्वतंत्र उमेदवार जाहीर केले आहेत.
हा फॉर्म्युला निश्चित झाल्यामुळे आता मुंबईत ‘महायुती’ विरुद्ध ‘राज-उद्धव युती’ असा थेट मुकाबला पाहायला मिळणार आहे. भाजपने मोठ्या भावाची भूमिका घेत सर्वाधिक जागा आपल्याकडे ठेवल्या आहेत, तर शिवसेनेनेही महत्त्वाच्या मराठी पट्ट्यात ९० जागा पदरात पाडून घेतल्या आहेत.
