मुंबई: मुंबई महानगरपालिका निवडणुकीच्या तोंडावर राजकीय आखाडा चांगलाच तापला आहे. भाजपचे नेते आणि मुंबई निवडणूक प्रभारी आशिष शेलार यांनी उद्धव ठाकरे यांच्यावर अत्यंत बोचरी टीका केली आहे. “उद्धव ठाकरेंनी बाळासाहेबांचे विचार कधीच सोडले होते, पण आता ज्या पद्धतीने पक्षात प्रवेश होत आहेत, त्यावरून ही संघटना आता ‘मामूंची पार्टी’ झाली आहे,” अशा शब्दांत शेलारांनी निशाणा साधला आहे.
बाळासाहेबांच्या विचारांना तिलांजली?
आशिष शेलार यांनी म्हटले आहे की, शिवसेना (UBT) म्हणजेच ‘उबाठा’ सेनेने हिंदुहृदयसम्राट बाळासाहेब ठाकरे यांचे कर्तृत्व, नेतृत्व आणि त्यांनी मांडलेला प्रखर विचार याला आधीच तिलांजली दिली होती. सत्तेच्या ओढीपायी त्यांनी आपली मूळ विचारधारा सोडल्याचा आरोप भाजपकडून सातत्याने केला जात आहे.
‘मामूंची पार्टी’ म्हणत डिवचलं
अलीकडच्या काळात उद्धव ठाकरे यांच्या उपस्थितीत होत असलेल्या विविध राजकीय प्रवेशांचा संदर्भ देत शेलार म्हणाले, “ज्या पद्धतीने ‘मामूंचे’ प्रवेश होत आहेत, त्यावरून या पार्टीचे स्वरूप आता पूर्णपणे बदलले आहे.” शेलार यांनी वापरलेला ‘मामू’ हा शब्द राजकीय वर्तुळात चर्चेचा विषय ठरला असून, यावरून आता शिवसेना (UBT) आणि भाजपमध्ये कलगीतुरा रंगण्याची शक्यता आहे.
मुंबई महानगरपालिकेत गेल्या २५ वर्षांपासून असलेल्या ठाकरेंच्या सत्तेला सुरुंग लावण्यासाठी भाजपने ‘हिंदुत्व’ आणि ‘बाळासाहेबांचे विचार’ हे दोन मुद्दे केंद्रस्थानी ठेवले आहेत.
