अमरावती : श्री शिवाजी शिक्षण संस्थेतर्फे दिला जाणारा या वर्षीचा प्रतिष्ठित ‘डॉ. पंजाबराव देशमुख स्मृती पुरस्कार २०२५’ महाराष्ट्राचे मुख्यमंत्री देवेंद्र फडणवीस यांना जाहीर करण्यात आला आहे. त्यांच्या राजकीय, सामाजिक व सांस्कृतिक कार्याची दखल घेत संस्थेने हा मोठा सन्मान त्यांना दिला आहे. पुरस्काराचे स्वरूप रु. पाच लक्ष रोख, स्मृतिचिन्ह, मानपत्र, शाल व श्रीफळ असे आहे.
भव्य सोहळ्यात पुरस्काराचे वितरण
श्री शिवाजी शिक्षण संस्थेचे अध्यक्ष हर्षवर्धन देशमुख यांनी पत्रकार परिषदेत ही माहिती दिली. शिक्षणमहर्षी डॉ. पंजाबराव उपाख्य भाऊसाहेब देशमुख यांच्या १२७ व्या जयंती उत्सवाच्या मुख्य समारंभात, म्हणजेच २७ डिसेंबर २०२५ रोजी, श्री शिवाजी शारीरिक शिक्षण महाविद्यालयाच्या भव्य प्रांगणात हा पुरस्कार मुख्यमंत्र्यांना प्रदान करण्यात येईल. मुख्यमंत्र्यांनी या समारंभाला उपस्थित राहून पुरस्कार स्वीकारण्यास सहमती दर्शवली आहे.
प्रमुख उपस्थिती
या सोहळ्याला महाराष्ट्राचे महसूल मंत्री तथा अमरावती जिल्ह्याचे पालकमंत्री चंद्रशेखर बावनकुळे, शालेय शिक्षण राज्यमंत्री पंकज भोयर, खासदार डॉ. अनिल बोंडे, खासदार बळवंत वानखडे यांच्यासह अनेक स्थानिक आमदार उपस्थित राहणार आहेत.
पुरस्कारासाठी फडणवीसांच्या कार्याची दखल
मुख्यमंत्री देवेंद्र फडणवीस यांना हा प्रतिष्ठित पुरस्कार खालील प्रमुख कारणांसाठी देण्यात येत आहे:
- सर्वसमावेशक विकास: मराठा, ओबीसी, मागासवर्गीय अशा विविध समाजघटकांसाठी कल्याणकारी योजना सुरू करून उपेक्षित घटकांना मुख्य प्रवाहात आणण्याचे काम.
- शेतकऱ्यांसाठी कार्य: ‘जलयुक्त शिवार’ योजनेच्या माध्यमातून राज्यातील लाखो शेतकऱ्यांची जमीन सुजलाम सुफलाम करण्याचे क्रांतिकारी कार्य.
- क्रांतिकारी प्रकल्प: समृद्धी महामार्गासारख्या मोठ्या पायाभूत प्रकल्पांच्या माध्यमातून महाराष्ट्राच्या विकासात क्रांतिकारी योगदान.
- आरोग्य सहाय्यता: मुख्यमंत्री वैद्यकीय सहाय्यता निधी – महाराष्ट्राच्या इतिहासात असे माणुसकीचे ऐतिहासिक कार्य यापूर्वी कधी झाले नाही, ज्यामुळे लाखो गरीब रुग्णांना उपचारासाठी मदत मिळाली.
- नक्षल निर्मूलन: गडचिरोली जिल्ह्यातील हिंसक नक्षल चळवळ लोकशाही आणि विकासाच्या मार्गाने संपविण्यासाठी तसेच वाट चुकलेल्या आदिवासी बांधवांना समाजाच्या मुख्य प्रवाहात आणण्यासाठी विशेष प्रयत्न.
कृषी आणि क्रीडा पुरस्कारांचेही वितरण
मुख्यमंत्र्यांना पुरस्कार प्रदान करण्यासोबतच जयंती उत्सवाच्या मुख्य समारंभात अन्य महत्त्वाच्या पुरस्कारांचेही वितरण होणार आहे:
- उत्कृष्ट शेतकरी पुरस्कार: खासदार शरदचंद्र पवार साहेबांनी दिलेल्या दाननिधीतून ‘शारदाबाई पवार उत्कृष्ट महिला शेतकरी पुरस्कार २०२५’ (विदर्भातील महिला) आणि केंद्रीय मंत्री नितीन गडकरी यांच्या दाननिधीतून ‘स्व. शरद जोशी उत्कृष्ट पुरुष शेतकरी पुरस्कार’ (विदर्भातील पुरुष) हे दोन कृषी पुरस्कार वितरित केले जातील.
- क्रीडारत्न पुरस्कार: खेळाडू विद्यार्थिनी कु. भक्ती गजानन चौधरी हिला क्रीडाक्षेत्रातील उल्लेखनीय प्राविण्याबद्दल ‘डॉ. पंजाबराव देशमुख क्रीडारत्न पुरस्कार’ प्रदान करण्यात येईल.
