मानवत : भारताची ओळख असलेल्या ‘विविधतेत एकता’ या संकल्पनेला अधिक बळकटी देण्यासाठी परभणी जिल्ह्यातील मानवत तालुक्यातील रूढी/खरबा पाटी येथे ‘संत संमेलना’चे (SANT SAMMELAN) आयोजन करण्यात आले आहे. सोमवार, १५ सप्टेंबर रोजी श्री क्षेत्र संत ज्ञानेश्वर माऊली मंदिरात हे संमेलन होणार आहे.
हे संमेलन समाजातील विसंगती दूर करून श्रद्धा, नैतिकता आणि त्याग यांसारख्या मूल्यांवर आधारित जीवन जगण्याचा संदेश देईल. सकाळी ९ ते दुपारी ४ या वेळेत होणाऱ्या या कार्यक्रमात जिल्ह्यातील अनेक नामवंत संत आणि महात्मे मार्गदर्शन करतील.
प्रमुख मार्गदर्शक
या संमेलनात संत तुकाराम महाराज गुरुड (ठाकुरखुर्द), अच्युत महाराज दस्तापुरकर, अमृतेश्वर शिवाचार्य महाराज (मठाधिपती), जिंतूर, माळकळी महाराज (मठाधिपती, श्री क्षेत्र अमराई संस्था, जिंतूर) व आचार्य महत दुधगावरकर शास्त्री (महामुनी आश्रम, अकोला पाटी), महामंडलेश्वर गुरुकृपा स्वामी मनीषानंदपुरी महाराज (संत श्री माळकळी ज्ञानोबा आश्रम, रूढी) हे प्रमुख प्रवचन देणार आहेत. या संतांच्या विचारातून समाजाला योग्य दिशा मिळेल अशी अपेक्षा नागरिकांमध्ये आहे.
सध्याच्या बदलत्या सामाजिक परिस्थितीत व्यक्तीवाद आणि सांस्कृतिक विघटनाचे आव्हान उभे आहे. अशा वेळी, संतपरंपरेचे विचारच या संकटावर उपाय ठरू शकतात. या संमेलनाच्या माध्यमातून संतांचा एकात्मतेचा संदेश आणि समाजजागृतीचे प्रयत्न सर्वदूर पोहोचविले जातील.
आयोजकांनी सर्व संतप्रेमी आणि नागरिकांना या संमेलनात मोठ्या संख्येने उपस्थित राहण्याचे आवाहन केले आहे.
