मुंबई : महाराष्ट्र सरकारने (Government of Maharashtra) एक महत्त्वपूर्ण निर्णय घेत भंडारा जिल्ह्याचे पालकमंत्री बदलले आहेत. मुख्यमंत्री देवेंद्र फडणवीस (CM Devendra Fadnavis) यांच्या नेतृत्वाखालील महायुती सरकारने सोमवारी रात्री उशिरा यासंदर्भातील शासकीय आदेश जारी केला. यानुसार, विदर्भातील भंडारा (Bhandara) जिल्ह्याचे पालकमंत्री संजय सावकारे (Sanjay Sawakare) यांची जागा आता गृहराज्यमंत्री पंकज भोयर यांना देण्यात आली आहे. पंकज भोयर (Pankaj Bhoyar) हे वर्धा जिल्ह्याचेही पालकमंत्री असून, त्यांच्या कार्यक्षम कामगिरीमुळे त्यांच्यावर भंडाऱ्याची अतिरिक्त जबाबदारी सोपवण्यात आली आहे.
काय आहे बदलामागील कारण?
संजय सावकारे यांची अचानक बदली का झाली, याबाबत राजकीय वर्तुळात चर्चा सुरू आहे. सूत्रांनुसार, भौगोलिक अंतर आणि प्रशासकीय कामकाजातील गतिमानता यामुळे हा निर्णय घेण्यात आला आहे. सावकारे यांच्यासाठी भंडारा जिल्ह्यातील प्रवास वेळखाऊ ठरत होता. याउलट, पंकज भोयर यांनी वर्धा जिल्ह्यात पालकमंत्री म्हणून उल्लेखनीय कामगिरी केली आहे. स्वतः मुख्यमंत्री फडणवीस आणि भाजप नेते चंद्रशेखर बावनकुळे यांनी त्यांच्या कामाचे कौतुक केले आहे.
पंकज भोयर यांच्या नियुक्तीमुळे भंडारा जिल्ह्यात प्रशासकीय कामांना गती मिळेल, अशी अपेक्षा व्यक्त होत आहे. विशेषतः आगामी स्थानिक स्वराज्य संस्थांच्या निवडणुकीच्या पार्श्वभूमीवर सरकारने तरुण आणि कार्यक्षम चेहऱ्यांना संधी देण्याचा निर्णय घेतला आहे. भोयर यांच्या जवळच्या वर्धा जिल्ह्यातील अनुभवाचा फायदा भंडाऱ्याला होईल, असे मानले जात आहे. दरम्यान, संजय सावकारे यांना बुलढाणा जिल्ह्याच्या सहपालकमंत्रीपदाची जबाबदारी देण्यात आली आहे.
सोमवारी रात्री राज्याचे उपसचिव दिलीप देशपांडे यांनी हा शासकीय आदेश जारी केला. या अचानक बदलामुळे राजकीय वर्तुळात भुवया उंचावल्या असून, हा निर्णय निवडणुकीच्या तयारीचा भाग असल्याचे बोलले जात आहे. भंडारा जिल्ह्यातील प्रशासकीय आणि राजकीय समतोल राखण्यासाठी सरकारने हा पाऊल उचलल्याचे सांगितले जात आहे.
या बदलामुळे भंडारा जिल्ह्यातील विकासकामांना नवी दिशा मिळेल, अशी आशा स्थानिक नागरिक आणि कार्यकर्त्यांना आहे.
