पुण्यात सध्या ३२ किलोमीटर अंतरात मेट्रो सेवा सुरू असून आगामी काळात ती १५० किलोमीटरपर्यंत विस्तारित करण्याचे उद्दिष्ट आहे. सार्वजनिक वाहतूक व्यवस्था सक्षम करण्यासाठी एक हजार ई-बस घेतल्या जाणार असून विमानतळाचाही विस्तार पूर्ण होणार असल्याची घोषणा केंद्रीय नागरी हवाई उड्डाण राज्यमंत्री मुरलीधर मोहोळ यांनी पुण्यात केली. भारतीय जनता पक्षाने निवडणुकीसाठी संकल्पपत्र तयार केले असून पुणेकरांसाठी या संकल्पपत्रात अनेक योजना जाहीर करण्यात आल्या आहेत.
पुणे महापालिका निवडणुकीच्या पार्श्वभूमीवर भाजपचा जाहीरनामा असलेले “विकसित पुण्यासाठी संकल्पपत्र” मुरलीधर मोहोळ आणि राज्याचे उच्च व तंत्रशिक्षण मंत्री चंद्रकांत पाटील यांच्या हस्ते प्रसिद्ध करण्यात आले. यावेळी मोहोळ बोलत होते. राज्यमंत्री माधुरी मिसाळ, आमदार हेमंत रासने, आमदार भीमराव तापकीर, प्रदेश सरचिटणीस राजेश पांडे, माजी मंत्री दिलीप कांबळे, माजी आमदार जगदीश मुळीक आदी यावेळी उपस्थित होते.
पुणेकर विकासाला सदैव पाठिंबा देणारे असून शहराला अधिक विकसित, स्वच्छ आणि आधुनिक बनविण्यासाठी भारतीय जनता पार्टी कटिबद्ध आहे, असे मुरलीधर मोहोळ म्हणाले. मुख्यमंत्री देवेंद्र फडणवीस यांनी पुण्यासाठी मांडलेला दूरदृष्टीपूर्ण ‘ब्ल्यू प्रिंट’ प्रत्यक्षात आणण्यासाठी भाजप सातत्याने प्रयत्नशील असल्याचेही त्यांनी सांगितले.
पुणे देशातील महत्त्वाचे शहर
पुणे हे सर्वसमावेशक आणि राहण्यासाठी योग्य शहर बनत असून देशातील एक महत्त्वाचे शहर म्हणून पुणे विकसित होत आहे. स्मार्ट सिटी योजनेत बाणेर-बालेवाडी भागाचा समावेश करून तेथे मोठ्या प्रमाणावर विकास करण्यात आला आहे. गेल्या पाच वर्षांत महापालिकेत काम करण्याची संधी पुणेकरांनी भाजपला दिली आणि दिलेले आश्वासने पूर्ण करण्याचा प्रामाणिक प्रयत्न भाजपकडून करण्यात आला.पुणेकरांना आता जुना कारभारी नको आहे.
शहराचा वारसा जपणार
पुण्यात सध्या ३२ किलोमीटर अंतरात मेट्रो सेवा सुरू असून आगामी काळात ती १५० किलोमीटरपर्यंत विस्तारित करण्याचे उद्दिष्ट आहे. तीन वर्षांत साडेदहा कोटी प्रवाशांनी मेट्रोने प्रवास केला आहे. सार्वजनिक वाहतूक अधिक सक्षम करण्यासाठी एक हजार ई-बसना मंजुरी देण्यात आली असून पुढील काळात साडेचार हजार ई-बस शहरात धावतील. त्यामुळे वाहतूक कोंडी कमी होऊन सुरक्षित प्रवास उपलब्ध होईल. पुणे विमानतळाच्या विस्तारासही प्राधान्य देण्यात येत असून सांस्कृतिक राजधानी म्हणून शहराचा वारसा जपतानाच आधुनिक पायाभूत सुविधा निर्माण करण्यात येत असल्याचेही मोहोळ यांनी नमूद केले.
महत्त्वाकांक्षी संकल्पनांचा समावेश
भाजपच्या जाहीरनाम्यात सर्वसामान्य नागरिक, महिला, ज्येष्ठ नागरिक, करदाते याबरोबरच आरोग्य, वाहतूक, गृहनिर्माण, सांस्कृतिक आणि आर्थिक विकास या मुद्यांना केंद्रस्थानी ठेवण्यात आले आहे. पुणे शहराला ‘वर्ल्ड बुक कॅपिटल’ बनविणे, अत्याधुनिक कन्व्हेन्शन सेंटर उभारणे, ‘एम्स’ रुग्णालय आणणे, नवीन मेट्रो मार्ग, डेटा सेंटर विकास आदी महत्त्वाकांक्षी संकल्पनांचा यात समावेश असल्याचे मोहोळ यांनी सांगितले.
