Ajit Pawar Plane Crash : महाराष्ट्राचे उपमुख्यमंत्री आणि राष्ट्रवादी काँग्रेसचे (एनसीपी) ज्येष्ठ नेते अजित पवार (६६) यांचे आज सकाळी बारामती येथे खासगी विमानाच्या भीषण अपघातात निधन झाले. या दुर्दैवी दुर्घटनेत विमानातील अन्य ४ जणांचा मृत्यू झाला आहे.
माहितीनुसार, उपमुख्यमंत्री अजित पवार हे मुंबईहून बारामतीकडे खासगी विमानाने रवाना झाले होते. जिल्हा परिषद आणि पंचायत समिती निवडणुकीच्या प्रचारासाठी आज त्यांच्या चार ते सहा सभा होणार होत्या. सकाळी सुमारे ८:४५ वाजता बारामती विमानतळावर लँडिंगचा प्रयत्न करताना विमानाला तांत्रिक बिघाड आला. विमान धावपट्टीवरून फिसलले, शेतात कोसळले आणि त्याला भीषण आग लागली. विमान जळून खाक झाले, मोठे स्फोट झाले आणि धुराचे लोट उठले.
नागरी विमान वाहतूक संचालनालयाने (DGCA) अपघाताची पुष्टी करताना सांगितले की, विमानात अजित पवार, त्यांचे सुरक्षारक्षक (PSO), एक सहाय्यक आणि दोन क्रू मेंबर्स (पायलट आणि फर्स्ट ऑफिसर) होते. सर्वांचा मृत्यू झाला. अपघातानंतर घटनास्थळी अग्निशमन दल, पोलिस आणि आपत्कालीन यंत्रणा दाखल झाल्या. DGCAने उच्चस्तरीय चौकशीचे आदेश दिले आहेत.
या घटनेमुळे संपूर्ण महाराष्ट्र आणि देशातील राजकीय वर्तुळात शोककळा पसरली आहे. पंतप्रधान नरेंद्र मोदी, गृहमंत्री अमित शाह, नितीन गडकरी, मुख्यमंत्री देवेंद्र फडणवीस, उपमुख्यमंत्री एकनाथ शिंदे, आदी नेत्यांनी श्रद्धांजली वाहिली आहे. शरद पवार, सुप्रिया सुळे आणि सुनेत्रा पवार दिल्लीहून बारामतीकडे रवाना झाले आहेत.
अजित पवार हे महाराष्ट्राच्या राजकारणातील ‘दादा’ म्हणून ओळखले जायचे. बारामतीतून सात वेळा आमदार, सहकार क्षेत्रातील योगदान आणि राज्याच्या विकासात त्यांची मोठी भूमिका राहिली. त्यांच्या निधनाने महाराष्ट्राने एक धडाडीचे नेते गमावला आहे.
प्रशासनाकडून अपघाताच्या उच्चस्तरीय चौकशीचे आदेश देण्यात आले आहेत.
