मुंबई : महाराष्ट्राच्या राजकारणात सध्या मोठी खळबळ उडाली आहे. गेल्या अनेक दिवसांपासून चर्चेत असलेली उद्धव ठाकरे आणि राज ठाकरे यांची युती आता अंतिम टप्प्यात आल्याचे संकेत मिळत आहेत. शिवसेना (उबाठा) खासदार संजय राऊत यांनी ठाकरे बंधूंचा एक फोटो शेअर करत, उद्या (बुधवारी) दुपारी १२ वाजता मोठ्या घोषणेचे संकेत दिले आहेत. मात्र, या ट्विटला भाजपने अत्यंत आक्रमक भाषेत प्रत्युत्तर दिले आहे.
संजय राऊत यांचे सूचक ट्विट
संजय राऊत यांनी उद्धव ठाकरे आणि राज ठाकरे यांचा एकत्रित फोटो ट्विट करत फक्त “उद्या १२ वाजता…” असे लिहिले आहे. या ट्विटमुळे राजकीय वर्तुळात चर्चेला उधाण आले असून, मुंबई महानगरपालिका निवडणुकीसाठी ठाकरे बंधूंच्या युतीची अधिकृत घोषणा उद्या होणार असल्याची दाट शक्यता वर्तवली जात आहे.
भाजपचा पलटवार: “तुमचे १२ वाजणार!”
संजय राऊत यांच्या ट्विटवर भाजपचे माध्यम विभाग प्रमुख नवनाथ बन यांनी जोरदार पलटवार केला आहे. राऊत यांच्या वेळेचा संदर्भ घेत त्यांनी थेट इशारा दिला, “तुमचे १२ वाजणार!”
भाजपने या युतीला ‘भीतीसंगम’ असे संबोधले असून, ही युती केवळ अस्तित्व टिकवण्यासाठीचा प्रयत्न असल्याची टीका केली आहे. नवनाथ बन यांच्या या विधानामुळे आगामी निवडणुकीतील संघर्ष किती टोकाचा असेल, याचे स्पष्ट चित्र दिसत आहे.
एकीकडे ठाकरे बंधूंच्या एकत्र येण्याने मराठी मतांची समीकरणे बदलण्याची शक्यता आहे, तर दुसरीकडे भाजपने ‘१२ वाजणार’चा इशारा देऊन विरोधकांचा पराभव निश्चित असल्याचा दावा केला आहे. उद्या दुपारी १२ वाजता नेमकी काय घोषणा होते, याकडे आता संपूर्ण महाराष्ट्राचे लक्ष लागले आहे.
