मुंबई : “महाराष्ट्रावर संकट असल्याचे सांगून राज आणि उद्धव ठाकरे एकत्र आले आहेत, पण मुळात या दोघांना महाराष्ट्र किती माहिती आहे? वांद्रे आणि दादरच्या पलीकडे महाराष्ट्र त्यांना कधी दिसलाच नाही,” अशा शब्दांत भाजपचे मुख्य प्रवक्ते केशव उपाध्ये यांनी ठाकरे बंधूंवर जोरदार टीका केली आहे. ठाकरे बंधूंच्या ग्रामीण महाराष्ट्रातील ज्ञानावरून उपाध्ये यांनी त्यांच्यावर प्रश्नचिन्ह उपस्थित केले आहे.
ग्रामीण महाराष्ट्राच्या प्रश्नांवरून कोंडी
केशव उपाध्ये यांनी ठाकरे बंधूंना थेट आव्हान देताना विचारले की:
दौरे आणि अभ्यास: महाराष्ट्रातील किती तालुक्यांत या दोघांनी दौरे केले आहेत? ग्रामीण भागातील पाच महत्त्वाचे प्रश्न तरी यांना माहिती आहेत का?
शेतकरी आणि सहकार: शेतकऱ्यांच्या अडचणी, सहकार क्षेत्र, शेती आणि पाणी या विषयातील पाच प्रश्न आणि त्यांची उत्तरे हे देऊ शकतील का?
राजकीय अधोगती: महाराष्ट्र वेगाने विकासाच्या वाटेवर असताना, या दोन्ही पक्षांची मात्र राजकीय अधोगती सुरू आहे. हे सत्य लपवण्यासाठीच ते महाराष्ट्रावर संकट असल्याच्या बाता मारत आहेत.
डोळा महापालिकेच्या तिजोरीवर
“गप्पा महाराष्ट्राच्या मारायच्या आणि डोळा मात्र मुंबई महापालिकेच्या तिजोरीवर ठेवायचा, हा यांचा खरा खेळ आहे,” असा गंभीर आरोपही उपाध्ये यांनी केला. केवळ सत्तेच्या स्वार्थासाठी आणि कोसळता राजकीय पाया वाचवण्यासाठीच हे दोन्ही पक्ष एकत्र येत असल्याचा टोला त्यांनी लगावला.
