मुंबई : नाशिक जिल्ह्यातील चांदवड तालुक्यातील मालसाणे येथील येथील जैन धर्मीयांच्या ‘श्री क्षेत्र णमोकार तीर्था’च्या (Shri Kshetra Namokar Tirth) सर्वांगीण विकासासाठी मुख्यमंत्री देवेंद्र फडणवीस यांनी ३६ कोटी ३५ लाख रुपयांच्या भव्य आराखड्याला आज मंजुरी दिली. सह्याद्री अतिथीगृह येथे झालेल्या उच्चस्तरीय बैठकीत मुख्यमंत्र्यांनी हे तीर्थक्षेत्र आंतरराष्ट्रीय स्तरावर धार्मिक केंद्र म्हणून विकसित करण्याचे निर्देश दिले.
आंतरराष्ट्रीय महोत्सवासाठी सज्जता
फेब्रुवारी २०२६ मध्ये (६ ते २५ फेब्रुवारी) येथे ‘आंतरराष्ट्रीय पंचकल्याण प्रतिष्ठान महोत्सव जैन कुंभमेळ्या’चे आयोजन करण्यात आले आहे. या सोहळ्यासाठी देशभरातून १० ते १५ लाख भाविक येण्याची शक्यता आहे. या पार्श्वभूमीवर मुख्यमंत्र्यांनी विशेष निधीची तरतूद केली आहे:
स्थायी विकास कामे: २४ कोटी २६ लाख रुपये.
महोत्सव आयोजन: १२ कोटी ९ लाख रुपये.
भाविकांच्या सुविधेसाठी ‘क्वालिटी’ कामांचे निर्देश
बैठकीत मुख्यमंत्री फडणवीस यांनी स्पष्ट केले की, विकासकामांच्या दर्जात कोणतीही तडजोड खपवून घेतली जाणार नाही. “देश-विदेशातून येणाऱ्या भाविकांना येथे आल्यावर केवळ सुविधाच नव्हे, तर अध्यात्माचे समाधान मिळाले पाहिजे,” असे मुख्यमंत्र्यांनी नमूद केले. त्यांनी प्रामुख्याने खालील सुविधांवर भर दिला आहे:
पाणीपुरवठा व स्वच्छता: नियमित पाणीपुरवठा आणि ४५० टॉयलेट ब्लॉक्सची उभारणी.
पायाभूत सुविधा: काँक्रीट रस्ते, संरक्षक भिंत, पार्किंग आणि हेलिपॅडची निर्मिती.
सुरक्षा: सीसीटीव्ही कॅमेरे, नियंत्रण कक्ष आणि तात्पुरती वैद्यकीय युनिट्स.
स्थानिक रोजगाराला मिळणार मोठी चालना
णमोकार तीर्थाच्या विकासामुळे केवळ धार्मिक पर्यटनालाच नव्हे, तर परिसरातील स्थानिकांना मोठ्या प्रमाणावर रोजगार उपलब्ध होईल. नाशिक-धुळे महामार्गावरील ४० एकर परिसरात पसरलेले हे तीर्थक्षेत्र देशातील महत्त्वाचे जैन धार्मिक केंद्र म्हणून उदयास येईल, असा विश्वास मुख्यमंत्र्यांनी व्यक्त केला.
या बैठकीला वित्त व नियोजन राज्यमंत्री ॲड. आशिष जयस्वाल, आमदार राहुल आहेर, नाशिकचे जिल्हाधिकारी आयुष प्रसाद आणि विविध विभागांचे वरिष्ठ अधिकारी उपस्थित होते.
