महाराष्ट्र : शिवसेना (उद्धव बाळासाहेब ठाकरे) नेते संजय राऊत (Sanjay Raut) हे पुन्हा राजकीय भाष्य करण्यासाठी सज्ज होत असल्याच्या वृत्तावरून भारतीय जनता पक्षाचे (BJP) मुख्य प्रवक्ते केशव उपाध्ये (Keshav Upadhye) यांनी त्यांच्यावर उपरोधिक टीका केली आहे. ट्विट करत उपाध्ये यांनी म्हटले आहे की, राऊत यांनी बोलणे सुरू ठेवलेच पाहिजे, कारण त्यांच्या बोलण्यामुळे भाजपच्या विजयाचा मार्ग सोपा होतो.
उपाध्ये यांनी त्यांच्या ट्विटमध्ये म्हटले आहे की, “संजय राऊत पुन्हा बोलणार ही बातमी आली आहे. सर्वप्रथम ते ठणठणीत बरे होवोत, त्यांच्या आरोग्यासाठी मनापासून शुभेच्छा. संजय राऊत यांनी बोललेच पाहिजे. त्याशिवाय भाजपाच्या विजयात हातभार कसा लागणार?
संजय राऊत यांच्या गेल्या १० वर्षांतील बोलणे पाहिले तर उध्दव ठाकरे यांच्या महत्वाकांक्षेला तात्विक जोड देण्याच्या प्रयत्नात त्यांनी शिवसेना-उबाठाचे दीर्घकालीन नुकसान केले आहे, त्यातून उबाठा आता बाहेर पडेल असे कुणीच म्हणणार नाही.
एकदा मुख्यंमंत्रीपद उध्दव ठाकरे ना मिळाले पण त्यासाठी कॅाग्रेससोबत जाण्याचे समर्थन करण्यासाठी जी केविलवाणी मांडणी संजय राऊत यांना करावी लागली त्यातून उबाठाचेच कायमचेच नुकसान झाले.
ज्या गोष्टी चुकीच्या आहेत, अथवा लगेचच्या काळात चुकीच्या ठरणार आहेत हे जिथे शेंबड्या मुलालाही कळते, तिथे राऊत अशा आर्विभावात या गोष्टी मांडत, की जणू एकमेव तेच खरे!. बरं, काल मांडलेली एखादी गोष्ट, उद्या त्याच्या नेमकी विरूध्द भूमिका मांडायला राऊत कचरत नाहीत.
ज्या मविआचा उमगच मुळात सत्तेसाठी झाला होता, त्या मविआचे तोंडभरून समर्थन राऊत करीत होते. मात्र त्याच मविआची गरज नसल्याचे राऊत यांनी छातीठोक पणे सांगितले. शिंदे मुखमंत्री असताना ते सरकार पडणार असल्याची आवई सतत तारखा देत होते.
अर्थात उध्दव ठाकरेंच अनाकलनीय निर्णयांच समर्थन करताना ही दमछाक होणारच पण हे सगळे जनता पहात असते, आणि यातूनच उबाठाची एक नकारात्मक प्रतिमा करण्यात राऊतांचे बोलणे व योगदान नाकारतां येणार नाही. म्हणूनच राऊत बोलतात त्याच्या उलटे होते असा इतिहास तयार झाला आहे. खुप उदाहरणे आहेत.
राऊत पुन्हा बोलणे सुरू करतील, ही भाजपसाठी शुभेच्छेची बातमी असून, त्याचा फायदा मुंबई महापालिका निवडणुकीत भाजपला निश्चितच होईल, असा विश्वास उपाध्ये यांनी व्यक्त केला आहे.
