मुंबई : महाराष्ट्रातील नगर परिषद आणि नगरपंचायतीच्या निवडणुका नुकत्याच पार पडल्या असून, आता सर्वांचे लक्ष या निवडणुकीच्या निकालाकडे लागले आहे. एका बाजूला निकालाची उत्सुकता असतानाच, दुसरीकडे मुंबई, पुणे, ठाणे यांसारख्या प्रमुख शहरांसह राज्यातील महानगरपालिका निवडणुका लवकरच जाहीर होण्याची शक्यता आहे. याचसोबत, राज्य निवडणूक आयोगाची पत्रकार परिषद देखील पुढच्याच आठवड्यात होणार असल्याची शक्यता वर्तवली जात आहे.
नगरपालिका/नगरपंचायतीच्या निकालाची तारीख निश्चित!
राज्य निवडणूक आयोगाने (SEC) दिलेल्या माहितीनुसार, राज्यातील नगरपरिषदा आणि नगरपंचायतीच्या झालेल्या निवडणुकीचा निकाल २१ डिसेंबर २०२५ रोजी जाहीर होणार आहे. यापूर्वी मतदानाच्या तारखेनंतर दुसऱ्याच दिवशी (३ डिसेंबर) निकाल अपेक्षित होता, परंतु तांत्रिक आणि न्यायालयीन प्रक्रियेमुळे निकालाची तारीख बदलण्यात आली आहे.
महानगरपालिका निवडणुका लवकरच?
नगरपालिका निवडणुका पार पडल्यानंतर आता स्थानिक स्वराज्य संस्थांच्या निवडणुकीचा पुढील टप्पा म्हणजेच महानगरपालिका निवडणुका लवकरच जाहीर होण्याची शक्यता आहे.
सर्वोच्च न्यायालयाने दिलेल्या निर्देशानुसार, ज्या स्थानिक स्वराज्य संस्थांची मुदत संपली आहे, त्यांच्या निवडणुका विहित वेळेत पूर्ण करणे बंधनकारक आहे. यामध्ये मुंबई, पुणे, ठाणे, नाशिक यांसह राज्यातील २९ महानगरपालिकांच्या निवडणुका प्रलंबित आहेत. अनेक प्रमुख महानगरपालिकांमध्ये प्रभाग रचनेचे काम यापूर्वीच सुरू झाले आहे. या प्रक्रिया पूर्ण होताच, राज्य निवडणूक आयोग महानगरपालिका निवडणुकीचा कार्यक्रम जाहीर करू शकतो.
यापूर्वी, राज्य निवडणूक आयोग राज्यातील सर्व महानगरपालिका निवडणुका तिसऱ्या टप्प्यात एकत्र घेण्याची शक्यता वर्तवली जात होती. मात्र, नगर परिषद आणि नगर पंचायत निवडणुकीतील आरक्षणावरून झालेल्या वादानंतर आयोगाने आपल्या भूमिकेत बदल केल्याचे संकेत मिळत आहेत. सध्याच्या माहितीनुसार, राज्य निवडणूक आयोग महानगरपालिका निवडणुका दुसऱ्या टप्प्यात आणि जिल्हा परिषद – पंचायत समिती निवडणुका तिसऱ्या टप्प्यात घेण्याचा विचार करत असल्याची नवी माहिती समोर येत आहे. यामुळे स्थानिक स्वराज्य संस्थांच्या निवडणुकीच्या वेळापत्रकात मोठा बदल होण्याची शक्यता आहे.
या निवडणुकीत राज्यातील सत्ताधारी महायुती आणि विरोधी महाविकास आघाडी यांच्यामध्ये मुख्य लढत होईल. त्यामुळे, आगामी काळात राजधानी मुंबईसह राज्यातील सर्व प्रमुख शहरांमध्ये राजकीय रणधुमाळी शिगेला पोहोचण्याची आणि अत्यंत चुरशीच्या लढती होण्याची चिन्हे आहेत.
२१ डिसेंबर रोजी नगरपालिका निवडणुकांचे निकाल जाहीर झाल्यानंतर, महाराष्ट्रातील स्थानिक राजकारणाला नवी दिशा मिळेल आणि त्यानंतर लगेचच महानगरपालिका निवडणुकांचे पडघम वाजण्याची शक्यता वर्तवली जात आहे.
