जामनेर, जळगाव : राज्यातील स्थानिक स्वराज्य संस्थांच्या निवडणुकीमुळे राजकीय वातावरण ढवळून निघाले असतानाच, जळगाव (Jalgaon) जिल्ह्यातून भारतीय जनता पार्टीचे (BJP) नेते तथा मंत्री गिरीश महाजन (Girish Mahajan) यांच्यासाठी अत्यंत आनंदाची बातमी समोर आली आहे. महाजन यांनी पूर्ण ताकद लावलेल्या जामनेर नगरपालिकेच्या (Jamner Nagar Palika) नगराध्यक्षपदी त्यांच्या पत्नी साधना महाजन (Sadhana Mahajan) यांची बिनविरोध निवड झाली आहे!
विरोधकांनी घेतली माघार
साधना महाजन यांची नगराध्यक्षपदी बिनविरोध निवड व्हावी, यासाठी गिरीश महाजन गेल्या काही दिवसांपासून जोरदार प्रयत्न करत होते. २० नोव्हेंबर रोजी निवडणुकीच्या मैदानात असलेले राष्ट्रवादी (शरद पवार गट), काँग्रेस आणि शिवसेना (शिंदे गट) या विरोधी पक्षांच्या तिन्ही उमेदवारांनी नगराध्यक्षपदाच्या निवडणुकीतून माघार घेतली. यामुळे साधना महाजन यांच्या बिनविरोध निवडीचा मार्ग मोकळा झाला.
जामनेरमध्ये भाजपची मजबूत आघाडी
महाजन यांच्या या प्रयत्नांना मोठे यश मिळाले असून, केवळ नगराध्यक्षपदच नव्हे, तर जामनेर नगरपालिकेमध्ये भाजपने आपली मजबूत पकड दाखवून दिली आहे. तर, जामनेर नगरपालिका ही जळगाव जिल्ह्यातील बिनविरोध नगराध्यक्ष निवडणारी पहिली नगरपालिका ठरली आहे.
बिनविरोध जागा: जामनेरमध्ये भाजपने आतापर्यंत २७ पैकी ५ जागा बिनविरोध जिंकल्या आहेत. (उज्वला दीपक तायडे, किलुबाई शेवाळे, सपना रवींद्र झाल्टे, संध्या जितेंद्र पाटील, आणि नानाभाऊ बाविस्कर ही बिनविरोध झालेल्या उमेदवारांची नावे आहेत.)
या मोठ्या विजयानंतर जामनेरमध्ये महाजन कुटुंबासह भाजपचे पदाधिकारी आणि कार्यकर्त्यांकडून मोठा आनंदोत्सव साजरा केला जात आहे. निवडणुकीच्या काळात अनेक बड्या नेत्यांची राजकीय प्रतिष्ठा पणाला लागली असताना, गिरीश महाजन यांनी पहिल्याच टप्प्यात मोठा राजकीय विजय मिळवला आहे.
