मुंबई महापालिका निवडणूक : बृहन्मुंबई महानगरपालिका (BMC) निवडणुकीची घोषणा अद्याप झालेली नसली तरी, राज्यातील सर्वात श्रीमंत असलेल्या या पालिकेवर कब्जा करण्यासाठी राजकीय पक्षांनी तयारीला प्रचंड वेग दिला आहे. याच पार्श्वभूमीवर भारतीय जनता पार्टीने (BJP) मुंबईत अत्यंत महत्त्वाकांक्षी असा ”मुंबईत अबकी बार 100 पार” चा नारा दिला आहे.
१५० जागांचा आत्मविश्वास
भाजपच्या अंतर्गत सर्वेक्षणात पक्षाला मुंबई महापालिकेत १०० हून अधिक जागा मिळण्याची शक्यता व्यक्त करण्यात आली आहे. या आत्मविश्वासातूनच भाजप नेत्यांनी विजयाचे दावे अधिक बुलंद केले आहेत:
अमित साटम यांचा अंदाज: भाजपचे मुंबई अध्यक्ष अमित साटम (Ameet Satam) यांनी तर भाजपला महापालिकेत १५० पेक्षा जास्त जागा मिळतील, असा अंदाज वर्तवला आहे.
रवींद्र चव्हाण यांचा विश्वास: भाजपचे प्रदेशाध्यक्ष रवींद्र चव्हाण यांनीही “महायुतीचा महापौर निश्चित आहे,” असा ठाम विश्वास व्यक्त केला. ते म्हणाले की, “मुंबईत बदल निर्विवाद आहे. नागरिकांचा पाठिंबा महायुतीला स्पष्टपणे दिसतो.”
प्रतिष्ठेची आणि सत्तेची लढाई
मुंबई महापालिका ही देशातील सर्वात श्रीमंत पालिका असल्याने या निवडणुकीची राजकीय प्रतिष्ठा प्रचंड मोठी आहे. भाजप यंदा महापालिकेवर कब्जा करण्यासाठी सर्वतोपरी प्रयत्न करत आहे. भाजपच्या ‘अब की बार १०० पार’ या बुलंद दाव्यांमुळे आगामी काळात मुंबई महापालिका निवडणुकीत अभूतपूर्व चुरस वाढणार आहे.
