मुंबई महापालिका निवडणूक : आगामी बृहन्मुंबई महानगरपालिका निवडणुकीत (BMC Election) पूर्ण ताकदीने सत्ता मिळवण्याच्या निर्धाराने भारतीय जनता पार्टीने (BJP) ‘मिशन बीएमसी’ यशस्वी करण्यासाठी जोरदार तयारी सुरू केली आहे. २०१७ च्या निवडणुकीतील अनुभवावरून शिकत, भाजपने यंदाच्या निवडणुकीसाठी एक नवीन रणनीतीचा फॉर्म्युला तयार केला आहे.
कोअर कमिटीची महत्त्वाची बैठक
मुंबई भाजप अध्यक्ष अमित साटम (Ameet Satam) यांच्या अध्यक्षतेखाली मुंबई भाजपच्या कोअर कमिटीची अत्यंत महत्त्वाची बैठक पार पडली. यावेळी मंत्री आशिष शेलार, मंगलप्रभात लोढा, प्रवीण दरेकर यांच्यासह सर्व वरिष्ठ नेते उपस्थित होते.
या बैठकीत, निवडणुकीसाठी तयार करण्यात आलेल्या नवीन फॉर्म्युल्यावर सविस्तर चर्चा झाली. यानुसार, काही प्रभागांमध्ये जागांची अदलाबदल होण्याची शक्यता आहे. या फॉर्म्युल्याला लवकरच वरिष्ठ पातळीवर अंतिम मंजुरी दिली जाईल. तसेच, आगामी निवडणूक तयारी, कार्यक्रम, संघटन आणि मतदारसंघनिहाय नियोजन यावर भर देण्यात आला. तसेच, कार्यकर्त्यांचा सक्रिय सहभाग वाढवण्यावर सविस्तर चर्चा झाली. या तयारीमुळे आणि ‘कोअर कमिटी’च्या बैठकीमुळे, मुंबई महानगरपालिकेत सत्ता मिळवण्यासाठी भाजपने रणनीती अधिक जोरदार केल्याचे स्पष्ट झाले आहे.
