धुळे : “२०१७ मध्ये दिलेली आश्वासने पूर्ण केल्यानंतर आज पुन्हा एकदा नव्या धुळ्याच्या निर्मितीसाठी आम्ही सज्ज आहोत. धुळे महानगरपालिकेच्या रौप्यमहोत्सवी वर्षात शहराला विकासाच्या नव्या उंचीवर नेण्याचा आमचा संकल्प आहे,” अशी ग्वाही मुख्यमंत्री देवेंद्र फडणवीस यांनी दिली. धुळे महानगरपालिका निवडणुकीच्या प्रचारार्थ आयोजित ‘कमळ विजयी संकल्प सभेत’ ते बोलत होते. यावेळी व्यासपीठावर मंत्री गिरीष महाजन, जयकुमार रावल, माजी केंद्रीय मंत्री डॉ. सुभाष भामरे, आमदार अनुप अग्रवाल यांसह भाजपचे अनेक दिग्गज नेते उपस्थित होते.
पाणी आणि घरांच्या प्रश्नावर कायमस्वरूपी तोडगा
धुळ्याच्या मूलभूत गरजांवर भाष्य करताना फडणवीस म्हणाले की:
अक्कलपाडा योजना: या योजनेमुळे पाणीपुरवठ्यात सुधारणा झाली असून, आता प्रत्येक घरात नळाद्वारे पाणी पोहोचवण्याचे ध्येय आहे.
हक्काचे घर: शहरातील प्रत्येक गरिबाला जमिनीचा मालकी हक्क देऊन ‘प्रधानमंत्री आवास योजने’तून पक्की घरे दिली जातील.
धुळे होणार ‘लॉजिस्टिक हब’
पंतप्रधान नरेंद्र मोदींच्या नेतृत्वात धुळे शहराचा कायापालट होत असल्याचे सांगत त्यांनी भविष्यातील योजना मांडल्या:
DMIC आणि उद्योग: धुळ्याचा समावेश ‘DMIC’ च्या दुसऱ्या टप्प्यात झाला असून, यामुळे उद्योगांचे जाळे निर्माण होऊन स्थानिकांना मोठ्या प्रमाणात रोजगार मिळेल.
कनेक्टिव्हिटी: सहा राष्ट्रीय महामार्गांमुळे धुळे आता ट्रान्सशिपमेंट आणि लॉजिस्टिकचे केंद्र बनले आहे. तसेच, धुळे विमानतळाच्या धावपट्टीचा विस्तारही केला जाणार आहे.
विकासकामांचा धडाका
शहराच्या सौंदर्यीकरणासाठी आणि सोयींसाठी कोट्यवधींचा निधी मंजूर करण्यात आला आहे:
पायाभूत सुविधा: भुयारी गटार योजना, रस्ते विकास, मोहाडी ट्रक टर्मिनस, आणि कचरा प्रक्रिया प्रकल्पाच्या कामांना गती देण्यात आली आहे.
धार्मिक पर्यटन: एकविरादेवी मंदिर परिसरातील घाट विकासासाठी विशेष तरतूद करण्यात आली आहे.
ई-बस सेवा: शहरात प्रदूषणाचे प्रमाण कमी करण्यासाठी ‘पीएम ई-बस’ सेवा सुरू केली जाणार आहे.
