डोंबिवली/मुंबई : पंतप्रधान नरेंद्र मोदी आणि राज्याचे मुख्यमंत्री देवेंद्र फडणवीस यांच्या लोकाभिमुख नेतृत्वावर विश्वास ठेवत महाराष्ट्र नवनिर्माण सेनेचे (MNS) कल्याण जिल्हाध्यक्ष आणि डोंबिवली पश्चिमेकडील माजी नगरसेवक प्रकाश भोईर यांनी शेकडो समर्थकांसह भारतीय जनता पक्षांत (BJP) प्रवेश केला आहे. भाजपा प्रदेशाध्यक्ष रवींद्र चव्हाण (Ravindra Chavan) यांच्या उपस्थितीत हा पक्षप्रवेश सोहळा पार पडला.
कल्याण-डोंबिवलीतील मनसेसाठी हा मोठा धक्का मानला जात आहे, तर भाजपची ताकद आगामी महापालिका निवडणुकांच्या पार्श्वभूमीवर वाढली आहे. प्रकाश भोईर यांच्यासह त्यांची पत्नी सरोज भोईर, मनसेचे उपशहर जिल्हाध्यक्ष श्रीकांत वारंगे, अशोक म्हात्रे, संदीप म्हात्रे, सचिन सणस, काशिनाथ भोईर, गुरुनाथ मांजरेकर यांच्यासह अनेक प्रमुख मनसे पदाधिकारी भाजपमध्ये दाखल झाले आहेत. या सर्वांचे रवींद्र चव्हाण यांनी पक्षात स्वागत करुन त्यांना पुढील वाटचालीस शुभेच्छा दिल्या.
रवींद्र चव्हाण म्हणाले, “आजचा दिवस अत्यंत आनंदाचा आहे. कार्यकर्त्यांशी असणारी नाळ जपणारे, राजकारणापलीकडे जाऊन जनतेच्या अडीअडचणींमध्ये खंबीरपणे साथ देणारे आमचे मित्र प्रकाश भोईर आणि सरोजताई भोईर यांच्या प्रवेशामुळे कल्याण-डोंबिवलीतील भाजपा परिवाराची ताकद आणखी वाढली आहे.” या प्रवेशामुळे पंतप्रधान मोदी आणि मुख्यमंत्री फडणवीस यांच्या लोकाभिमुख व विकासाभिमुख नेतृत्वावर विश्वास ठेवून भाजप परिवारात येणाऱ्यांची संख्या दिवसागणिक वाढत आहे, हे पुन्हा एकदा सिद्ध झाल्याचे सांगितले.
या पक्षप्रवेश सोहळ्याला कल्याण जिल्हाध्यक्ष नंदू परब, भाजपा अनुसूचित जाती मोर्चा प्रदेश महामंत्री शशिकांत कांबळे, डोंबिवली पश्चिम मंडल अध्यक्ष प्रियाताई जोशी, जुनी डोंबिवली मंडल अध्यक्ष पवन पाटील, कल्याण डोंबिवली महानगरपालिकेतील माजी स्थायी समिती सभापती दिपेश म्हात्रे, युवा नेते अनमोल म्हात्रे यांच्यासह भाजपचे इतर पदाधिकारी व कार्यकर्ते उपस्थित होते. या प्रवेशामुळे कल्याण-डोंबिवली महानगरपालिका निवडणुकीत भाजपची बाजू अधिक मजबूत होणार असल्याचे राजकीय विश्लेषकांचे मत आहे.
