नाशिक: नाशिकच्या सांस्कृतिक आणि वैचारिक परंपरेचा मानबिंदू असलेल्या वसंत व्याख्यानमालेच्या प्रांगणात सध्या एक ऐतिहासिक पर्व अनुभवयाला मिळत आहे. रामतीर्थ गोदावरी सेवा समिती आणि वसंत व्याख्यानमाला यांच्या संयुक्त विद्यमाने आयोजित ‘कथा तथागत भगवान गौतम बुद्ध’ या त्रिदिवसीय व्याख्यानमालेचा आज, ३ मे २०२६ रोजी भक्तिमय वातावरणात सांगता समारोह संपन्न होणार आहे. गेल्या दोन दिवसांपासून नाशिककरांनी या सोहळ्याला दिलेला अभूतपूर्व प्रतिसाद पाहता, आजचा सांगता सोहळा प्रज्ञा आणि करुणेच्या विचाराने संपूर्ण गोदाकाठ उजळून टाकणारा ठरणार आहे.
आज सांगता समारोहाचे आकर्षण
आज, ३ मे रोजी संध्याकाळी ७:१५ वाजता या त्रिदिवसीय सोहळ्याची सांगता होईल. गेल्या दोन दिवसांच्या उत्साहवर्धक अनुभवानंतर, आजचा अंतिम दिवस अधिक भव्य असण्याची शक्यता आहे. स्वामी गोविंद देवगिरी महाराज यांच्या अमृतवाणीतून तथागतांच्या जीवनातील अंतिम सत्य आणि धम्माचा संदेश ऐकण्यासाठी नाशिककरांमध्ये मोठी उत्सुकता आहे.
“नाशिकच्या वैचारिक भूमीत बुद्ध विचारांचे हे अमृत सिंचन सर्वांसाठी आनंददायी आहे. सांगता समारोहाच्या दिवशी संपूर्ण परिसर बुद्धमय होईल, याची अनुभूती घेण्यासाठी नाशिककरांनी मोठ्या संख्येने उपस्थित राहावे,” असे आवाहन आयोजकांतर्फे करण्यात आले आहे.
रामतीर्थ गोदावरी सेवा समिती आणि वसंत व्याख्यानमाला यांच्या संयुक्त विद्यमाने आयोजित आजचा हा सोहळा केवळ एका कार्यक्रमाची सांगता नसून, नाशिकच्या सामाजिक आणि सांस्कृतिक इतिहासातील एक सुवर्ण पान ठरणार आहे, यात शंका नाही.
महोत्सवाचा शुभारंभ
या महोत्सवाचा शुभारंभ अत्यंत उत्साहात देव मामलेदार यशवंत महाराज पटांगण येथे झाला. कार्यक्रमाची सुरुवात महाराष्ट्र गीत आणि ‘वंदे मातरम’वरील नृत्याविष्काराने झाली, ज्यामुळे वातावरणात चैतन्य निर्माण झाले. यावेळी परमपूजनीय स्वामी गोविंद देवगिरी महाराज यांना वसंत व्याख्यानमालेच्या वतीने सन्मानपत्र प्रदान करून गौरविण्यात आले.
कार्यक्रमाचे सचिव प्रा. संजय साळवे यांनी आपल्या स्वागतपर भाषणातून या आयोजनामागची भूमिका स्पष्ट केली. ते म्हणाले, “हा सोहळा केवळ कथाश्रवण नसून तो प्रज्ञा, शील आणि करुणेचा सामूहिक अंगीकार आहे. फुले-शाहू-आंबेडकरी चळवळीने जो समतेचा विचार पेरला, त्याचे मूळ बुद्धाच्या शिकवणुकीत आहे.” या विधानाने कार्यक्रमाला एक व्यापक सामाजिक आणि वैचारिक परिमाण प्राप्त करून दिले.
पूजनीय स्वामी गोविंद देवगिरी महाराज यांनी महान बौद्ध भिक्खू आणि कवी अश्वघोष रचित ‘बुद्धचरित’ या महाकाव्याचा आधार घेत बुद्ध कथा मांडली. सिद्धांताचे बालपण, त्यांचा महाभिनिष्क्रमण (त्यागाचा प्रवास) आणि विश्वाला दिलेला शांतीचा संदेश महाराजांनी अत्यंत ओघवत्या भाषेत नाशिककरांसमोर ठेवला. विशेष म्हणजे, पुरोहितांनी आयोजित केलेल्या या बौद्ध कथेला सर्व स्तरांतून मिळालेला प्रतिसाद हा सामाजिक समरसतेचे उत्तम उदाहरण ठरला आहे.
सामाजिक एकतेचे दर्शन
या सोहळ्याचे सर्वात मोठे यश म्हणजे यात लाभलेला सर्वसमावेशक सहभाग. सामाजिक समरसता मंच, संविधान जागर समिती, आधार महिला मंडळ आणि ‘जय भीम आर्मी’ यांसारख्या विविध संघटनांनी एकत्र येत स्वामीजींचे स्वागत केले. ही दृश्ये नाशिकच्या सामाजिक वीण अधिक घट्ट करणारी ठरली आहेत. वसंत व्याख्यानमालेचे अध्यक्ष श्रीकांत बेणी आणि रामतीर्थ समितीचे जयंत गायधनी यांच्या मार्गदर्शनाखाली हा सोहळा यशस्वी होत आहे.