महिला शेतकऱ्यांना शेतकरी म्हणून मान्यता देणाऱ्या विधेयक
अहिल्यानगर येथे महिला शेतकऱ्यांना स्वतंत्र ओळख आणि शेतकरी म्हणून अधिकृत मान्यता मिळवून देण्याच्या उद्देशाने मुख्यमंत्री देवेंद्र फडणवीस यांच्या पुढाकारातून ‘महाराष्ट्र महिला शेतकरी सक्षमीकरण अधिनियम, २०२६’ हे विधेयक आणण्यात आले आहे. या निर्णयाबद्दल अहिल्यानगर जिल्ह्यातील महिला शेतकऱ्यांनी मुख्यमंत्री फडणवीस यांच्याप्रती कृतज्ञता व्यक्त केली.
रक्षाबंधनाच्या पार्श्वभूमीवर शेतकरी भगिनींनी मुख्यमंत्र्यांना राखी बांधून या निर्णयाबद्दल आभार मानले. महिला शेतकऱ्यांच्या योगदानाला अधिकृत मान्यता मिळवून देणाऱ्या या उपक्रमाचे त्यांनी स्वागत केले.
महिलांचा शेती क्षेत्रातील सहभाग मोठा असूनही अनेक वेळा त्यांची स्वतंत्र शेतकरी म्हणून ओळख आणि भूमिका पुरेशी अधोरेखित होत नाही. या पार्श्वभूमीवर महिला शेतकऱ्यांना शेतकरी म्हणून मान्यता देणारे हे विधेयक महिलांच्या सक्षमीकरणाच्या दृष्टीने महत्त्वाचे पाऊल मानले जात आहे.
यावेळी मुख्यमंत्री देवेंद्र फडणवीस यांनी राखी बांधून कृतज्ञता व्यक्त करणाऱ्या सर्व शेतकरी भगिनींचे आभार मानले. महिला शेतकऱ्यांच्या कष्टांना आणि शेतीतील योगदानाला सन्मान मिळवून देण्यासाठी शासन कटिबद्ध असल्याचा संदेश या प्रसंगातून देण्यात आला.
महिला शेतकऱ्यांच्या हक्कांना मान्यता, सन्मानाला नवी दिशा आणि शेतीतील त्यांच्या योगदानाला अधिक बळ देणारा हा निर्णय ठरण्याची अपेक्षा व्यक्त केली जात आहे.
