यकृत प्रत्यारोपण, कर्करोग आणि मेंदूवरील गुंतागुंतीच्या शस्त्रक्रिया यांसारख्या अत्यंत खर्चिक उपचारांअभावी राज्यातील एकाही गरजू रुग्णाचा जीव जाऊ नये, या उदात्त हेतूने राज्य सरकारने एक मोठे आणि संवेदनशील पाऊल उचलले आहे. उपमुख्यमंत्री देवेंद्र फडणवीस यांच्या विशेष मार्गदर्शनाखाली ‘मुख्यमंत्री सहाय्यता निधी व धर्मादाय रुग्णालय मदत कक्ष’ आणि ‘टाटा ट्रस्ट’ यांच्यात झालेल्या सामंजस्य करारातून राज्यातील आर्थिकदृष्ट्या दुर्बल रुग्णांना मोठा दिलासा मिळाला आहे. या कराराच्या अंमलबजावणीतून पहिल्या सहा महिन्यांतच तब्बल ८९ लाख ६० हजार ३०१ रुपयांची थेट वैद्यकीय मदत मंजूर करण्यात आली आहे.
पहिल्या टप्प्यात १५० रुग्णांना संजीवनी देण्याचे उद्दिष्ट
मुख्यमंत्री सहाय्यता निधी, धर्मादाय रुग्णालय मदत कक्ष आणि टाटा ट्रस्ट यांच्यात १२ फेब्रुवारी २०२६ रोजी हा महत्त्वपूर्ण सामंजस्य करार करण्यात आला होता. या उपक्रमांतर्गत पहिल्या टप्प्यात राज्यातील १५० अतिगंभीर आणि दुर्धर आजारांनी ग्रस्त असलेल्या गरजू रुग्णांना आर्थिक सहाय्य पुरवण्याचे उद्दिष्ट निश्चित करण्यात आले आहे. या करारामुळे तातडीने आणि प्रभावी उपचार मिळण्याचा मार्ग मोकळा झाला आहे.
६ महिन्यांत ९ रुग्णांवर यशस्वी उपचार
करार झाल्यापासून अवघ्या सहा महिन्यांच्या कालावधीत राज्यातील विविध भागांतील ९ रुग्णांना ८९.६० लाखांहून अधिक रकमेची मदत सुपूर्द करण्यात आली आहे. या निधीतून यकृत प्रत्यारोपण (Liver Transplant), कर्करोगाचे (Cancer) महागडे उपचार आणि मेंदूवरील जटिल शस्त्रक्रिया (Brain Surgeries) यशस्वीरीत्या पार पडल्या आहेत. या मदतीमुळे अनेक कुटुंबांवरील आर्थिक संकट दूर होऊन रुग्णांना नवजीवन मिळाले आहे.
इतर नामांकित संस्थांसोबतही कराराची प्रक्रिया सुरू
देवेंद्र फडणवीस यांच्या पुढाकाराने आरोग्य क्षेत्रात सामाजिक उत्तरदायित्वाची (CSR) ही नवी साखळी निर्माण केली जात आहे. टाटा ट्रस्टप्रमाणेच इतरही अनेक नामांकित सामाजिक संस्था आणि कॉर्पोरेट ट्रस्टसोबत अशाच प्रकारचे सामंजस्य करार करण्याची प्रक्रिया सध्या अंतिम टप्प्यात आहे. यामुळे येत्या काळात वैद्यकीय मदतीची व्याप्ती अधिक वाढणार आहे.
“पैशांअभावी उपचार थांबणार नाहीत“
“राज्यातील आर्थिकदृष्ट्या दुर्बल आणि गरजू घटकांतील रुग्णांना वेळेत व दर्जेदार आरोग्य सुविधा मिळाव्यात यासाठी मुख्यमंत्री सहाय्यता निधी कक्ष सातत्याने कार्यरत आहे. पैशांअभावी कोणत्याही रुग्णाचा उपचार अपूर्ण राहू नये, हाच आमचा मुख्य उद्देश आहे,” अशी माहिती मुख्यमंत्री सहाय्यता निधी व धर्मादाय रुग्णालय मदत कक्षाचे प्रमुख रामेश्वर नाईक यांनी दिली.
गरजू रुग्णांसाठी हेल्पलाइन:
मुख्यमंत्री सहाय्यता निधी अथवा धर्मादाय रुग्णालयांच्या माध्यमातून वैद्यकीय मदतीची आवश्यकता असल्यास गरजू रुग्ण व त्यांच्या नातेवाईकांनी 1800 123 2211 या टोल-फ्री क्रमांकावर संपर्क साधावा, असे आवाहन प्रशासनातर्फे करण्यात आले आहे.
