दिल्ली : प्रजासत्ताक दिनाच्या (Republic Day 2025) राजधानीतील कर्तव्यपथावरील मुख्य सोहळयात महाराष्ट्राची बीड जिल्ह्याची कन्या फ्लाईंग ऑफिसर दामिनी देशमुख (Damini Deshmukh) ध्वजारोहणानंतर ध्वजावर पुष्पवृष्टी करणार आहेत. बीड जिल्ह्यातील वडवणी तालुक्यामधील देवडी गावची दामिनी दिलीप देशमुख वायुदलात फ्लाईंग ऑफिसर म्हणून कार्यरत असून राजधानी दिल्लीतील कर्तव्यपथावर होणाऱ्या मुख्य सोहळयात ‘परेड कमांडर’ म्हणून जबाबदारी सांभाळणार आहेत. गेल्या काही दिवसांपासून बीड जिल्हा विविध कारणांसाठी चर्चेत आहे. अशा परिस्थितीत बीडसह संपूर्ण महाराष्ट्राला अभिमान वाटावा, अशी ही एक विशेष आणि आनंददायक गोष्ट आहे.
प्रजासत्ताक दिनाचा मुख्य सोहळा दरवर्षी राजधानी दिल्लीतील कर्तव्यपथावर मोठ्या दिमाखात पार पडतो. या कार्यक्रमाला राष्ट्रपती, पंतप्रधान तसेच अनेक मान्यवर उपस्थित असतात. संपूर्ण देश आणि जगाचे लक्ष वेधून घेणाऱ्या या सोहळ्यात भारताच्या सामर्थ्याचे आणि महान सांस्कृतिक वारशाचे दर्शन घडते. कर्तव्यपथावरील पथसंचलनात भारतीय वायू सेनेची भव्य तुकडीही सामील असते. यंदा या पथसंचलनात वायू सेनेच्या 144 सदस्यांच्या तुकडीचे नेतृत्व चार अधिकाऱ्यांनी परेड कमांडर म्हणून करायचे आहे. विशेष म्हणजे, या नेतृत्वात बीड जिल्ह्यातील फ्लाईट लेफ्टनंट दामिनी देशमुख यांचाही समावेश आहे.
दामिनी देशमुखच्या या ऐतिहासिक भूमिकेमुळे बीड जिल्ह्याच्या नावलौकिकात भर पडली असून, तिच्या कर्तृत्वाने संपूर्ण महाराष्ट्राला अभिमान वाटतो आहे.
दामिनीचे वडील न्यायधीश दिलीप देशमुख हे पुणे विभागाचे माजी धर्मादाय आयुक्त असून त्यांचा कुटुंबियांचा सामाजिक आणि शैक्षणिक वारसा दामिनीने आपल्या मेहनतीने पुढे नेला आहे. वर्ष 2019 मध्ये देशपातळीवरील कॉमन ऍडमिनिस्ट्रेटिव्ह परीक्षेत उल्लेखनीय यश मिळवत भारतीय वायुदलात फ्लाईंग ऑफिसर पद मिळवले. दामिनीने अश्वारोहन, कराटे, योगा, रायफल शूटिंग, खो-खो आणि व्हॉलीबॉलमध्येही प्राविण्य मिळवले असून कराटेमध्ये ब्लॅक बेल्टची सुवर्णपदक विजेती आहे.