नाशिक जिल्ह्यातील भगुर हे स्वातंत्र्यवीर विनायक दामोदर सावरकर यांचें जन्मस्थान आहे. देशाच्या स्वातंत्र्यानंतर भगुर मध्ये सावरकरांचे जन्मभूमी स्मारक व्हावे यासाठी भगुरमधील राष्ट्रभक्त स्व. मधुकर अण्णा जोशी, मा. एकनाथराव शेटे आणि त्यांचे सर्व सहकारी यांनी तत्कालीन जनसंघाचे आमदार स्व. रामभाऊ म्हाळगी यांच्या माध्यमातून अतोनात प्रयत्न, आंदोलन तथा संघर्ष केल्याने अखेर पुढे १९९२साली भाजप सेनेच्या युती शासन काळात भगुर मध्ये सावरकरांचे जन्मभूमी स्मारक निर्माण झाले.
परंतु या स्मारकात सुरवातीस अपेक्षित असलेले सावरकर साहित्य, त्यांच्या प्रतिमा, विक्रीस समग्र सावरकर साहित्य उपलब्ध नव्हते. पुढे मा.देवेंद्र फडणवीस यांच्या शासन काळात प्रथमच महाराष्ट्राच्या इतिहासात मुख्यमंत्र्यांच्या प्रमूख उपस्थितीत भगुरला सावरकर जयंती उत्सव मोठ्या अभिमानाने संपन्न झाला.
नंतर मा.रणजित सावरकरांच्या सहकार्याने स्वा. सावरकर राष्ट्रीय स्मारक, मुंबई मार्फत सावरकर साहित्य उपलब्ध झाले, पुढे राज्याचे पर्यटनमंत्री मा. मंगलप्रभात लोढा व विवेक व्यासपीठ मुंबई वतीने सावरकर विचारांच्या प्रचार प्रसार साठी सावरकर थीमपार्क संकल्पना उदयास आली होती, सावरकरांचे कोणतेही काम हे अडथळयाशिवाय पूर्ण होत नाही म्हणतात ना तसे विविध प्रक्रिया होत.
आज मुख्यमंत्री एकनाथ शिंदे यांच्या नेतृत्वाने भाजप सेनेच्या युती शासनानेच पुन्हा एकदा स्वातंत्र्यवीर सावरकरांचा जीवनपट उलगडून दाखवणारे स्मारक सांस्कृतिक थीमपार्क च्या रुपात चाळीस कोटी रुपयांनी साकारण्यात येणार आहे. सावरकर यांच्या निवासस्थानाजवळच दोन हेक्टरवर हे थीमपार्क साकारण्यात येईल.या ठिकाणी त्यांच्या शपथेपासून संपुर्ण जीवन संघर्ष दर्शन, त्यांचे लेखन,क्रांतिकारकांच्या भेटी,अंदमान वास्तव्य, जन्मठेप शिक्षा हे सर्व कथाकथन, दृक श्राव्य माध्यमातून सादर केले जाणार आहे.
सावरकरांच्या थीमपार्क मुळे भगुर हे गाव पुन्हा एकदा जगाच्या नकाशावर प्रकाशमान होणार आहे.
भगुर शहराचा या सावरकर थीमपार्क मुळे सर्वांगीण विकास साधला जाणार आहे.भगुर मध्ये पर्यटकांची संख्या वाढत जाणार आहे. भगुर येथील बाजारपेठेतील व्यापार प्रगत होण्यास नव्याने चालना मिळणार आहे. भगुर शहरातील रस्ते, पुल व परिसर सुव्यवस्थित होण्यास मदत होणार आहे. विविध प्रकारचे व्यवसाय त्यात हॉटेल इतर अनेक छोटे मोठे उद्योग व्यवसाय वाढीस लागण्यास निश्चित उपयोग होईल, अनेक व्यवसायामुळे शहरातील तरुणांना रोजगार संधी प्राप्त होणार आहे. गावातील शिक्षण, सहकार, बँका आणि पतसंस्था आदी क्षेत्र विकसित होत सर्वांची प्रगती साधणार आहे. शहरातील व परिसरातील बेकारी, अस्वछता, रोगराई नष्ट होईल.
भगुर शहर हे महाराष्ट्राच्या इतिहासात प्रेक्षणीय स्थळ म्हणून, देशभक्तीचा संस्कार देणारे ऊर्जा केंद बनणार आहे. सावरकरांच्या अष्टपैलू व्यक्तिमत्त्व दर्शन घडवणारे भगुर शहर हे सर्व समाजातील सर्वांना प्रेरणादायी तीर्थक्षेत्र ठरणार आहे.
भगुर शहराचा सावरकर थीमपार्क मुळे सर्वार्थाने सर्वांगीण विकास साधला जाणार आहे.
क्रांतीसुर्य सावरकरांच्या या सांस्कृतिक थीमपार्क मुळे भगुर मध्ये विकासाची पहाट होणार असा विश्वास व्यक्त करून स्वातंत्र्यवीर सावरकरांच्या पवित्र स्मृतींना कोटी कोटी प्रणाम करतो.
वंदे मातरम् !
प्रा. डॉ. मृत्युंजय दिनेश कापसे
भगुर , नाशिक.
