मुंबई : वंचित बहुजन आघाडीचे नेते प्रकाश आंबेडकर (Prakash Ambedkar) यांनी मराठा आरक्षण (Maratha Reservation) आंदोलनाचे नेते मनोज जरांगे (Manoj Jarange) यांच्यावर ट्विट करत जोरदार टीका केली आहे. जरांगे यांच्या मराठा आरक्षण आंदोलनावर प्रश्नचिन्ह उपस्थित करताना प्रकाश आंबेडकर यांनी त्यांना श्रीमंत मराठा नेत्यांचे समर्थन करणारे ठरवले आहे.
प्रकाश आंबेडकर म्हणाले, “मनोज जरांगे पाटील, तुम्ही मराठ्यांच्या आरक्षणासाठी सरकारविरुद्ध लढत आहात. पण, सरकारमध्ये कोण आहे? आताच्या सरकारमध्ये एकनाथ शिंदे, अजित पवार, राधाकृष्ण विखे पाटील, अशोक चव्हाण, नारायण राणे सारखे प्रस्थापित मराठा आहेत. अडीच वर्षांपूर्वी महाविकास आघाडीचे सरकार असतांना सत्तेत सर्व प्रस्थापित मराठा होते. शरद पवार, अजित पवार, पृथ्वीराज चव्हाण, जयंत पाटील, बाळासाहेब थोरात हे सर्व प्रस्थापित मराठे सत्तेत होते. तुम्ही निवडणुकीत या श्रीमंत मराठ्यांचा प्रचार केला आणि त्यांना मतदान केले. तुम्ही गरीब मराठ्यांसाठी आंदोलन करत आहात पण, गरीब मराठ्यांना वंचित ठेवणाऱ्या श्रीमंत मराठ्यांना तुम्ही पाठिंबा देत आहात. गरीब मराठ्यांना मूर्ख बनवू नका”, असा थेट इशाराच त्यांनी दिला आहे.
आंबेडकरांनी पुढे म्हटले की, लोकसभा आणि विधानसभा निवडणुकीत तुम्ही श्रीमंत मराठ्यांना पाठिंबा दिला होता. आगामी स्थानिक स्वराज्य संस्थांच्या निवडणुकीत तुम्ही पुन्हा तीच भूमिका घ्याल आणि गरीब मराठ्यांना मूर्ख बनवाल का?,” असा सवाल त्यांनी उपस्थित केला. आंबेडकर यांनी जरांगे यांच्या आंदोलनाच्या राजकीय हेतूंवर शंका घेत, त्यांना गरीब मराठ्यांच्या हितासाठी खऱ्या अर्थाने लढण्याचे आवाहन केले.
प्रकाश आंबेडकर यांच्या या टीकेमुळे राजकीय वर्तुळात खळबळ उडाली आहे. मराठा आरक्षणाचा मुद्दा सध्या राज्यात गाजत असताना, आंबेडकरांचे हे वक्तव्य जरांगे यांच्या आंदोलनाच्या विश्वासार्हतेवर प्रश्नचिन्ह निर्माण करणारे ठरले आहे. आगामी निवडणुकांच्या पार्श्वभूमीवर या टीकेला काय प्रत्युत्तर मिळते, याकडे सर्वांचे लक्ष लागले आहे. मनोज जरांगे यांनी अद्याप या टीकेला प्रत्युत्तर दिलेले नाही. मात्र, यामुळे मराठा समाजातील अंतर्गत राजकारण आणि आरक्षणाच्या लढ्याला नवे वळण मिळण्याची शक्यता आहे.
