पुणे : पुणे शहरातील पर्वती परिसरातील जनता वसाहत येथे एका व्यक्तीने “पाकिस्तान जिंदाबाद” अशी घोषणाबाजी केल्याचा आरोप करण्यात आला आहे. या घटनेमुळे परिसरात तीव्र संताप व्यक्त होत असून, संबंधित व्यक्तीवर कठोर कायदेशीर कारवाई करण्याची मागणी स्थानिक नागरिकांनी आणि सामाजिक संघटनांनी केली आहे.
नेमकी घटना काय?
मिळालेल्या माहितीनुसार, पर्वती परिसरातील जनता वसाहत येथे राहणाऱ्या अमन मुल्ला नावाच्या व्यक्तीने पाकिस्तानचे समर्थन करत घोषणाबाजी केल्याचा आरोप स्थानिक रहिवाशांनी केला आहे. या प्रकारामुळे परिसरात तणावाचे वातावरण निर्माण झाले असून सामाजिक सलोखा बिघडण्याची शक्यता व्यक्त केली जात आहे.
सकल हिंदू समाजाचे पोलिसांना निवेदन
या प्रकरणाची दखल घेत सकल हिंदू समाज, पुणे शहर यांच्या वतीने पर्वती पोलीस ठाण्याचे वरिष्ठ पोलीस निरीक्षक यांना अधिकृत निवेदन देण्यात आले आहे. या तक्रारीत म्हटले आहे की, भारतात राहून परदेशी राष्ट्राचे उदात्तीकरण करणाऱ्या अशा घोषणांमुळे देशाच्या सार्वभौमत्वाला धोका निर्माण होतो तसेच देशभक्त नागरिकांच्या भावना दुखावल्या जातात. तक्रारदारांनी असेही सांगितले आहे की, अशा घटनांकडे वेळेत लक्ष न दिल्यास भविष्यात सामाजिक तणाव वाढण्याची शक्यता आहे. ही तक्रार सकल हिंदू समाज, पुणे शहर यांच्या वतीने देण्यात आली असून निवेदनावर संघटनेच्या प्रतिनिधींच्या स्वाक्षऱ्या आहेत. पर्वती पोलीस ठाण्याने या निवेदनावर अधिकृत शिक्का बसवला आहे.
पोलीस सूत्रांनी दिलेल्या माहितीनुसार, या तक्रारीची दखल घेण्यात आली असून प्रकरणाची प्राथमिक चौकशी सुरू करण्यात आली आहे. तक्रारीतील तथ्यांची पडताळणी केल्यानंतर कायद्यानुसार पुढील पावले उचलली जातील. दरम्यान, पोलिसांनी नागरिकांना शांतता राखण्याचे आणि कोणत्याही अफवांवर विश्वास न ठेवण्याचे आवाहन केले आहे.
