जळगाव : विधानसभा निवडणुकीत महाविकास आघाडीचा मोठा पराभव झाला आहे. राष्ट्रवादी शरदचंद्र पवार पक्षालाही अपेक्षित यश मिळाले नाही आणि शरद पवार गटातून केवळ १० आमदार निवडून आले. या परिस्थितीत, निवडणुकीनंतर खान्देशातील एक बडा नेता शरद पवारांची साथ सोडण्याच्या तयारीत आहे. जळगावातील राष्ट्रवादी शरदचंद्र पवार पक्षाचे नेते आणि माजी मंत्री गुलाबराव देवकर (Gulabrao Devkar) हे अजित पवार गटात प्रवेश करणार आहेत. त्यांच्यासोबत जवळपास ५ हजारांपेक्षा जास्त कार्यकर्ते आणि पदाधिकारी अजित पवार गटात प्रवेश करणार आहेत.
गुलाबराव देवकर यांनी टीव्ही ९ मराठीशी बोलताना सांगितले की, ते अजित पवार गटात जाणार आहेत. माजी मंत्री आणि जळगावातील राष्ट्रवादी शरद पवार गटाचे नेते असलेले देवकर यांनी अजित पवार गटाचे प्रदेशाध्यक्ष सुनील तटकरे यांची भेट घेतली आहे. ते सोमवारी अजित पवार यांची भेट घेणार असून, त्या भेटीनंतर प्रवेश सोहळ्याची तारीख आणि जागा निश्चित होईल.
चिंतन बैठकीत कार्यकर्त्यांनी सत्तेत जाण्याची इच्छा व्यक्त केली होती आणि त्यानुसार अजित पवार गटात जाण्याचा निर्णय घेण्यात आला. जळगाव ग्रामीण मतदारसंघातील आणि जिल्ह्यातील अनेक राष्ट्रवादी शरद पवार गटाचे पदाधिकारी व कार्यकर्ते अजित पवार गटात प्रवेश करणार आहेत, असे गुलाबराव देवकर यांनी सांगितले.
विधानसभा निवडणुकीतील पराभवाचा धक्का अजूनही पचवत असतानाच, जळगाव जिल्ह्यात गुलाबराव देवकर यांच्यासह अनेक कार्यकर्ते अजित पवार गटात जाणार आहेत. हा शरद पवार गटासाठी मोठा धक्का मानला जात आहे. तर दुसरीकडे, आगामी स्थानिक स्वराज्य संस्थांच्या निवडणुकांमध्ये जळगाव जिल्ह्यात अजित पवार गटाला हे एक मोठं बळ प्रदान करणार आहे.
