मुंबई : भारतीय जनता पक्षाचे प्रदेश उपाध्यक्ष केशव उपाध्ये यांनी काँग्रेसच्या तुष्टीकरणाच्या राजकारणावर तीव्र शब्दांत प्रहार केला आहे. “काँग्रेसला हिंदूंच्या भावनांबाबत मौन असते, मात्र विशिष्ट समुदायाच्या तुष्टीकरणासाठी त्यांचा हिंदूद्वेषाचा महापूर थांबत नाही,” अशा शब्दांत त्यांनी काँग्रेसवर टीकास्त्र सोडले आहे.
केशव उपाध्ये यांनी उपस्थित केलेले मुख्य मुद्दे
दुटप्पी सहानुभूती : इराणचे नेते खोमेनी यांच्यासाठी सहानुभूतीचा सूर लावला जातो, मात्र हिंदूंच्या श्रद्धास्थानांबाबत काँग्रेसची भूमिका नेहमीच संशयास्पद राहते, असा आरोप उपाध्ये यांनी केला.
बाटला हाऊस आणि श्रीराम : “बाटला हाऊस चकमकीबाबत काँग्रेस नेत्यांकडून प्रचंड दुःख व्यक्त केले जाते, पण दुसरीकडे प्रभू श्रीरामाच्या अस्तित्वावरच प्रश्नचिन्ह उभे केले जाते,” असे म्हणत त्यांनी काँग्रेसच्या जुन्या भूमिकांची आठवण करून दिली.
पहेलगाम आणि निषेध : पहेलगामसारख्या घटनांवर काँग्रेसकडून ठाम निषेध व्यक्त होत नाही. मुस्लीम तुष्टीकरणासाठी काँग्रेस तीळतीळ झटत असल्याची टीकाही त्यांनी केली.
धर्मनिरपेक्षतेवर प्रश्नचिन्ह : हिंदू भावनांबाबत मौन बाळगणे आणि विशिष्ट विचारधारेला पाठिंबा देणे, हीच का काँग्रेसची तथाकथित धर्मनिरपेक्षतेची व्याख्या आहे? असा सवाल त्यांनी उपस्थित केला आहे.
